глас 4Яко благоверен и праведен, за любовь Христа Бога от своих си смерть приял еси, Ярополче, страстотерпче святый, благоверный княже Волынский, и пролиял еси кровь твою, якоже прежде сродницы твои и страстотерпцы богоблаженнии Борис и Глеб. Ихже подвигом ревнуя благочестно, Господеви взывал еси усердне: даруй ми кончину, якоже братиям моим, да и аз омыв грехи моя кровию моею, и избавлюся мира сего тщетнаго и мятежнаго. Темже здесь сошедшеся в память твою верою и любовию славим Господа, укрепившаго тебе в подвизе напрасныя смерти, якоже бо агнец незлобивый от раба заколен еси, и себе самаго жертву непорочну Господеви принесл еси, Егоже моли, присноблаженне, спасти отечество твое, и державе сродник твоих Богоугодней быти, и сыновом российским спастися.
Слава
глас 3Возсия днесь преславная память твоя, благородне страстотерпче Христов Ярополче богомужне, созывающе нас к похвалению Христа Бога нашего. Темже к тебе днесь притекающе, с любовию взываем радостно: блаженна земля, упитавшаяся кровьми твоими, и свята селения, приимшая дух твой, идеже в раи нетленныя пищи наслаждаяся, не забуди нас, воспевающих тя, но присно поминай в молитвах твоих к Богу, да избавимся от всех бед и скорбей, иже присно память твою почитающии.
Величание
Величаем тя, святый благоверный княже Ярополче, и чтим святую память твою, ты бо молиши за нас Христа Бога нашего.
Молитва
